Formula 1 H2O ilk bor Issiqkoʻlda bo‘lib o‘tdi

Musobaqa dasturidan erkin mashgʻulotlar, saralash bahslari, ikkita sprint poygasi hamda asosiy start – Qirgʻiziston Gran-prisi oʻrin oldi. Issiqkoʻldagi bosqich Formula 1 H2O jahon chempionatining 2026-yilgi mavsumidagi ikkinchi poyga boʻldi.

Qirgʻiziston Gran-prisida amerikalik pilot Shaun Torrente gʻolib chiqdi. Ikkinchi oʻrinni shvetsiyalik Jonas Andersson, uchinchi oʻrinni esa estoniyalik Stefan Arand egalladi. Torrente bundan avval ham birinchi sprint poygasida gʻalaba qozonib, pole positionni qoʻlga kiritgan boʻlsa, ikkinchi sprint poygasida Andersson birinchi boʻldi.

Mazkur bosqich Qirgʻiziston uchun tarixiy voqea boʻldi. Issiqkoʻl ilk bor Formula 1 H2O taqvimidan oʻrin oldi, Qirgʻiziston esa Markaziy Osiyoda ushbu chempionat bosqichiga mezbonlik qilgan birinchi davlatga aylandi.

Qirgʻizistondagi bosqichning yana bir oʻziga xos jihati uning oʻtkazilgan joyi boʻldi. Dengiz sathidan 1 607 metr balandlikda joylashgan Issiqkoʻl Formula 1 H2O taqvimidagi eng baland togʻli bosqichga aylandi. Uzunligi 1 929 metr boʻlgan poyga trassasi Bayet qishlogʻi yaqinida, Ak-Maral va Chaika dam olish maskanlari oraligʻida tashkil etildi.

Formula 1 H2O – Xalqaro suv-motor sporti ittifoqi (UIM) homiyligida oʻtkaziladigan jahondagi eng nufuzli suv-motor sporti chempionatidir.

Musobaqada soatiga 250 kilometrgacha tezlikka chiqa oladigan bir oʻrinli poyga katerlari ishtirok etadi. Yuqori tezlik va murakkab trassalar uygʻunligi Formula 1 H2Oni suvdagi halqa poygalarining eng yuqori toifasiga aylantiradi.