6 ming ishtirokchi, 25 mamlakat va 42,2 kilometrlik marafon: Bishkekda Snow Leopard Run bo‘lib o‘tdi

18-oktabr kuni «Manas» xalqaro aeroporti hududida Bishkek Snow Leopard Run musobaqasi yettinchi bor o‘tkazildi.

Musobaqada 25 dan ortiq mamlakatdan qariyb 6 ming kishi ishtirok etdi. Bu yil musobaqa dasturiga ilk bor 42,2 kilometrlik to‘liq marafon masofasi kiritildi. Shuningdek, ishtirokchilar 5, 14 va 21,1 kilometrlik masofalarda ham yugurishdi. 5 kilometrlik yugurish qirg‘iz yozuvchisi Chingiz Aytmatov xotirasiga bag‘ishlandi.

Musobaqaning eng yoshi katta ishtirokchisi 80 yoshli Viktor Tyumentsev bo‘lib, u 14 kilometrlik masofani bosib o‘tdi. Bellashuvda Bishkek shahar hokimligi va uning tarkibiy bo‘linmalari xodimlari ham qatnashdi. Barcha ishtirokchilarga esdalik medallari topshirildi.

Bishkek Snow Leopard Run sportni tabiatni muhofaza qilish tashabbuslari bilan birlashtiradi. Har yili ishtirokchilar badalining bir qismi qor qoploni va uning yashash muhitini asrash dasturlariga yo‘naltiriladi.

Musobaqaning marafon va yarim marafon masofalari Xalqaro marafonlar va masofaviy yugurishlar assotsiatsiyasi (AIMS) tomonidan sertifikatlangan. 2026-yilda musobaqa Qirg‘iziston, Qozog‘iston, O‘zbekiston va Ozarbayjondagi yugurish musobaqalarini birlashtiruvchi Turkic Alliance of Long Runs (TAN) turkumiga ham qo‘shildi.