Qozog‘iston va Janubiy Koreya havo taksilari uchun texnologiyalarni birgalikda rivojlantiradi
Ikki davlat uchuvchisiz aviatsiyani rivojlantirishga kelishib oldi. Alatau City past balandlikdagi havo hududini boshqarish tizimi joriy etiladigan ilk maydonga aylanadi.
15-sentabr kuni Qozog‘iston Transport vazirligi, Sun’iy intellekt va raqamli rivojlanish vazirligi hamda Koreya Respublikasining Yer, infratuzilma va transport vazirligi o‘zaro anglashuv memorandumini imzoladi. Hujjat texnologiyalar transferi, shuningdek, uchuvchisiz havo kemalari harakatini boshqarish – UTM (Unmanned Aircraft System Traffic Management) tizimini yaratish va joriy etish bo‘yicha hamkorlikni nazarda tutadi.
UTM nima?
UTM uchuvchisiz havo kemalari foydalanadigan past balandlikdagi havo hududini boshqarish uchun mo‘ljallangan.
Hamkorlik doirasida Qozog‘iston zamonaviy raqamli texnologiyalarni o‘zlashtirish va mahalliylashtirishni rejalashtirmoqda. Tizimni boshqarish va ma’lumotlarni qayta ishlash Qozog‘istonda, milliy qonunchilik talablariga muvofiq amalga oshiriladi.
Tizim Qozog‘istonda shahar havo mobilligini rivojlantirishga xizmat qiladi. Bu yo‘nalishda mamlakat eVTOL – vertikal qo‘nish va parvoz qilish imkoniyatiga ega elektr havo kemalaridan foydalanish, shuningdek, uchuvchisiz logistika tizimini rivojlantirishni ko‘rib chiqmoqda.
Loyihani amaliy jihatdan Janubiy Koreyaning Korea Airports Corporation (KAC) va Qozog‘istonning Alatau Advance Air Group (AAAG) kompaniyalari amalga oshiradi.
Loyihani amalga oshirishda ICAOning xalqaro standartlari va tavsiya etilgan amaliyotlari, shuningdek, Qozog‘istonning aviatsiya xavfsizligi, kiberxavfsizlik va muhim infratuzilmani himoya qilish bo‘yicha talablari hisobga olinadi.
Alatau City Qozog‘istonda UTM tizimini amaliy joriy etish va shahar havo mobilligi ekotizimini rivojlantirish uchun birinchi maydonga aylanadi.
Ommabop
Almati BMTning yangi raqamli markaziga aylanadi
Yangi markaz Osiyo va Tinch okeani mamlakatlari uchun foydali bo‘lishi mumkin bo‘lgan raqamli yechimlarni birlashtiradi va ilgari suradi. Markazni 2027-yilda ishga tushirish rejalashtirilgan.
BMT Tojikiston tashabbusi bilan Xavfsiz sun’iy intellekt kunini ta’sis etdi
BMT Bosh Assambleyasi Xavfsiz, himoyalangan va ishonchli sun’iy intellekt xalqaro kunini ta’sis etdi.
Qozog‘istonda yangi aviayo‘nalishlarga talabni prognoz qiluvchi tizim yaratildi
Tizimni yaratishda ishlab chiquvchilar so‘nggi besh yil davomida amalga oshirilgan 200 millionta reys haqidagi ma’lumotlar hamda aviakompaniyalarning qariyb 170 ta hisobotini tahlil qildi.