Toshkentdagi Islom sivilizatsiyasi markazi Ginnes rekordlar kitobidan o‘rin oldi

Mazkur yutuq Ginnes rekordlar kitobiga rasman kiritildi.

Rekord qayd etilgani haqidagi sertifikatni Guinness World Records hakami Sheyda Subasi topshirdi. Marosim davomida u loyiha miqyosi va ahamiyatini yuksak baholab, uning amalga oshirilishida ishtirok etgan barcha mutaxassislarga, jumladan me’morlar, loyihachilar, dizaynerlar va quruvchilarga minnatdorlik bildirdi.

Islom sivilizatsiyasi markazi Toshkent shahridagi tarixiy Hazrati Imom majmuasi yaqinida joylashgan. Majmuaning me’moriy konsepsiyasi o‘rta asrlar islom me’morchiligi yodgorliklaridan ilhomlangan. Bino balandligi 34 metr bo‘lgan to‘rtta peshtoq va 65 metrli markaziy gumbazdan iborat.

Markaz tarkibiga Qur’on zali, 460 o‘rinli konferensiya zali hamda mintaqa tarixini islomdan avvalgi davrdan to bugungi kungacha yoritib beruvchi ekspozitsiyalarga ega muzey majmuasi kiradi.

Kutilishicha, Islom sivilizatsiyasi markazi mintaqaning yirik ilmiy-ma’rifiy maskanlaridan biriga aylanadi. Kelgusida muassasa O‘zbekiston xalqaro islom akademiyasi hamda xorijdagi ilmiy va ta’lim markazlari bilan hamkorlikni rivojlantirishni rejalashtirmoqda.

Obyektning Ginnes rekordlar kitobiga kiritilishi uning islom sivilizatsiyasining boy merosini asrash, o‘rganish va targ‘ib etishdagi o‘rni xalqaro miqyosda e’tirof etilganini anglatadi.