Qashqadaryo viloyatida qadimiy altar topildi
Qashqadaryo viloyatining Qamashi tumanidagi Odirmon arxeologik yodgorligida olimlar qadimiy altar va marhumlarning qoldiqlarini saqlash uchun ishlatilgan ossuariy – maxsus idishni topdi.
Altar yodgorlikning shimoli-sharqiy qismida joylashgan. Uning yuzasida olov izlari saqlanib qolgan. Inshootning balandligi qariyb 70 sm, kengligi esa 90 sm bo‘lib, uning poli pishiq g‘ishtlar bilan qoplangan. Arxeologlarning ma’lumotlariga ko‘ra, altar yuzasidagi loy suvoq bir necha bor yangilangan. Bu inshootdan uzoq vaqt davomida foydalanilgan bo‘lishi mumkinligini ko‘rsatadi.
Topilgan ossuariyning tashqi yuzasida bug‘u va archa daraxtiga o‘xshash tasvirlar saqlanib qolgan. Ularning ma’nosi hozircha aniqlanmagan. Mutaxassislar topilma restavratsiya qilingandan so‘ng tasvirlarni batafsil o‘rganishni rejalashtirmoqda.
Dastlabki ma’lumotlarga ko‘ra, Odirmon arxeologik yodgorligi miloddan avvalgi III asrdan milodiy III asrgacha bo‘lgan davrga oid.