Qozogʻiston Li Auto, OMODA va JAECOO bilan yangi avtomobil loyihalarini eʼlon qildi
Hukumat Xitoyning Li Auto, OMODA va JAECOO avtomobil brendlarini, shuningdek, SITRAK avtonom yuk mashinalarini mahalliy ishlab chiqarishni yo‘lga qo‘yish rejasini e’lon qildi.
Bu haqda sanoat va qurilish vaziri Yersayin Nagaspayev hukumat yig‘ilishida ma’lum qildi.
Vazirning aytishicha, kelishuvlarga Qozog‘iston Prezidenti Qosim-Jomart Toqayevning yaqinda Xitoyga amalga oshirgan tashrifi chog‘ida erishilgan. Avtomobil ishlab chiqarishdan tashqari, tomonlar BYD kompaniyasi bilan hamkorlikda elektromobillar uchun tezkor quvvatlash stansiyalari tarmog‘ini rivojlantirishni ham rejalashtirmoqda.
Qozog‘iston avtomobil sanoati o‘sishda davom etmoqda. O‘tgan yili mamlakatda 171 mingdan ortiq avtomobil ishlab chiqarilgan bo‘lsa, joriy yilda ishlab chiqarish hajmini 190 mingtagacha yetkazish rejalashtirilmoqda. 2026 yilning dastlabki olti oyida korxonalarda 94,4 ming avtomobil ishlab chiqarildi, bu o‘tgan yilning shu davriga nisbatan 35 foizga ko‘p.
Hozirda Qozog‘istonda yengil avtomobillar, avtobuslar, yuk mashinalari va maxsus texnika ishlab chiqaruvchi 11 ta korxona faoliyat yuritmoqda. O‘tgan yili KIA Qazaqstan va Astana Motors Manufacturing Kazakhstan yangi zavodlari ishga tushirildi.
Avtomobillarni yig‘ish bilan bir qatorda, hukumat avtomobil butlovchi qismlarini mahalliy ishlab chiqarishni ham yo‘lga qo‘yishni rejalashtirmoqda. Rejalarga po‘lat, mis, alyuminiy, plastmassa va rezinadan tayyorlanadigan detallar, kabel mahsulotlari hamda avtomobil sanoati uchun boshqa butlovchi qismlarni ishlab chiqarish kiradi.