Markaziy Osiyo davlatlari dunyoning eng tinch mamlakatlari qatoridan joy oldi

Global Peace Index − Iqtisodiyot va Tinchlik instituti (Institute for Economics & Peace − IEP) tomonidan har yili tuziladigan reyting bo‘lib, unda 163 ta davlat va hududdagi tinchlik darajasi baholanadi.

So‘nggi reytingda O‘zbekiston 1,726 ball bilan 37-o‘rinni, Qozog‘iston 1,771 ball bilan 44-o‘rinni, Tojikiston 1,799 ball bilan 47-o‘rinni, Qirg‘iziston 1,853 ball bilan 61-o‘rinni, Turkmaniston esa 1,903 ball bilan 66-o‘rinni egalladi. IEP Markaziy Osiyoning barcha besh davlatini tinchlik darajasi yuqori bo‘lgan mamlakatlar toifasiga kiritdi.

Global tendensiya fonida Markaziy Osiyo

Mintaqa mamlakatlarining natijalari dunyo miqyosida tinchlik darajasining pasayishi fonida alohida ajralib turadi. GPI 2026 ma’lumotlariga ko‘ra, global o‘rtacha ko‘rsatkich 0,7 foizga yomonlashgan va dunyoda tinchlik darajasi ketma-ket 12-yil pasayishda davom etmoqda. O‘tgan yil davomida 99 ta davlatda ko‘rsatkichlar yomonlashgan bo‘lsa, 62 ta davlatda yaxshilangan.

Shu bilan birga, Sharqiy Yevropa va Markaziy Osiyo mintaqasi umumiy hisobda biroz yaxshilanish qayd etdi. Mintaqaning o‘rtacha ko‘rsatkichi 2,114 ni tashkil etib, 0,006 punktga yaxshilandi.

Global Peace Index 23 ta miqdoriy va sifat ko‘rsatkichlari asosida hisoblanadi. Ular uchta asosiy yo‘nalishga birlashtirilgan: jamiyat xavfsizligi va ijtimoiy himoyalanganlik, davom etayotgan ichki va xalqaro mojarolar hamda militarizatsiya.