Ayollar yetakchiligi, raqamli ko‘nikmalar va go‘zallik sohasidagi ta’lim loyihasi: SHHT Ayollar forumi qanday yakunlandi

Forumda SHHTga aʼzo davlatlar, xalqaro tashkilotlar, biznes hamjamiyati va fuqarolik jamiyati vakillari ishtirok etdi.

Forumning asosiy mavzusi ayollar yetakchiligi bo‘ldi. Ishtirokchilar ayollarning siyosat va iqtisodiyotdagi o‘rni, tadbirkorlikni rivojlantirish, raqamli texnologiyalar hamda xalqaro hamkorlik masalalarini muhokama qildi.

Forum Qirgʻizistonning SHHTga raisligi doirasida tashkil etildi. SHHT Kotibiyati maʼlumotiga ko‘ra, ishtirokchilar ayollarning davlat boshqaruvidagi ishtirokini kengaytirish, ularning kasbiy rivojlanishini qo‘llab-quvvatlash va o‘z salohiyatini ro‘yobga chiqarish uchun yangi imkoniyatlar yaratish masalalarini muhokama qildi. SHHT gender tengligi mintaqaning barqaror rivojlanishidagi muhim omillardan biri ekanini taʼkidladi.

Alohida sessiya raqamli texnologiyalarga bagʻishlandi. Unda ayol tadbirkorlarni qoʻllab-quvvatlash, raqamli ko‘nikmalarni rivojlantirish va zamonaviy texnologiyalar yaratadigan yangi imkoniyatlar haqida fikr almashildi.

Forumning amaliy natijalari

Forum nafaqat muhokamalar, balki bir qator qoʻshma tashabbuslarning eʼlon qilinishi bilan ham yakunlandi.

Kaktus.media xabariga ko‘ra, Butunxitoy ayollar federatsiyasi Qirgʻiziston Ayollar kongressiga goʻzallik industriyasi sohasidagi qoʻshma qirgʻiz-xitoy taʼlim loyihasini boshlash toʻgʻrisidagi maktubni topshirdi. Loyiha doirasida ayollar goʻzallik industriyasi kasblarini bepul oʻrganishi mumkin boʻlgan oʻquv markazini ochish rejalashtirilgan.

Loyiha uchun uskunalarni Xitoy tomoni taqdim etadi, o‘quv jarayonini esa Qirgʻiziston tomoni tashkil qiladi. Dastlabki markaz Bishkekda ochilishi rejalashtirilgan. Keyinchalik shunday markazlarni mamlakatning boshqa hududlarida ham ochish ko‘zda tutilgan.

Forum davomida xitoylik mutaxassislar zamonaviy makiyaj va teri parvarishi bo‘yicha mahorat darsini ham o‘tkazdi. Trening ishtirokchilari sertifikatlar bilan taqdirlandi.

Madaniy dastur

Forumning ishbilarmonlik dasturi madaniy tadbirlar bilan davom etdi. Mehmonlar qirgʻiz dizaynerlarining kolleksiyalarini tomosha qildi, milliy hunarmandchilik namunalarini ko‘rdi, anʼanaviy taomlardan tatib ko‘rdi hamda mamlakatning madaniy merosi bilan tanishdi. Tashkilotchilar bunday uchrashuvlar SHHT davlatlari o‘rtasidagi madaniy aloqalarni mustahkamlashga xizmat qilishini taʼkidladi.

Keyingi qadamlar

SHHT Ayollar forumi Qirgʻizistonning 2026-yildagi SHHTga raisligi doirasidagi muhim tadbirlardan biri bo‘ldi. Forum yakunlari va unda ilgari surilgan tashabbuslar ayollar tadbirkorligi, taʼlim, raqamli texnologiyalar va xalqaro hamkorlik yo‘nalishlaridagi qoʻshma loyihalarni amalga oshirishda qoʻllanilishi rejalashtirilmoqda.